Ош облусунун Ноокат районунун Көк-Бел айыл аймагында жаңы "Тигүү цехинин" ачылышы өттү. Бул окуя жергиликтүү коомчулук үчүн маанилүү окуялардын бирине айланды, анткени ал Кара-Кыргыз автономиялуу облусунун түзүлүшүнүн 100 жылдыгын утурлай ишке киргизилди. Ишкананын ачылышы өлкөдөгү экономикалык өсүштү, жергиликтүү өндүрүштү жана аймактык өнүгүүнү күчтөндүрүү багытында зор мааниге ээ болду.

 

Жергиликтүү коомчулуктарды колдоо долбоорун кошумча каржылоо долбоорунун алкагында жалпы суммасы 5471,3 миллион сомго оңдоо иштери жана заманбап өндүрүш жабдуулары сатып алынды. Бул инвестициялар аймакта жаңы иш орундарынын ачылышына, жергиликтүү өндүрүштүн өнүгүшүнө жана аялдардын жумуш менен камсыз болушуна чоң салым кошот.

 

Цехтин ачылышы жергиликтүү экономикага гана эмес, ошондой эле улуттук деңгээлде да олуттуу таасир тийгизет. Жылына 12 миллион сомдон ашык суммага  6 түрдөгү сапаттуу тигүү продукциясын өндүрүү жана онлайн-сатуу каналдары аркылуу сырттан буюртмаларды тартуу пландалган.

 

25 жаңы жумуш орду жана жергиликтүү ишкерлер үчүн түзүлгөн кошумча нарк чынжырчалары аймактык экономиканы өркүндөтүүгө жардам берет. Бул чаралар айрыкча аялдарды иш менен камсыз кылуу, алардын өз алдынча ишкердикти алып баруу мүмкүнчүлүгүн кеңейтүүгө багытталган.

 

"Жергиликтүү өндүрүштү колдоо жана аялдарды иш менен камсыз кылуу — бул биздин келечекке болгон инвестициябыз," — деп белгиледи бизнес- өнөктөш Токтобай Айткулов өз  сөзүндө. "Биздин максатыбыз — жергиликтүү өнүмдөрдү экспорттоонун жаңы мүмкүнчүлүктөрүн ачуу, ишкерлерди жандандыруу жана жамаатка туруктуу киреше алып келүү."

 

100 жылдыкка карата өткөрүлгөн бул долбоор Ноокат районундагы өндүрүштүк мүмкүнчүлүктөрдү арттырууга чоң өбөлгө түзүп, жаңы этапка өтүүдө. Көк-Бел айыл аймагындагы тигүү цехи өлкөнүн өндүрүштүк чөйрөсүндө маанилүү күчкө айланып, анын ийгиликтүү иштеши бүтүндөй аймактын туруктуу өсүшүнө салым кошот.